Article

Home » Blogs » Roupa tahan ida hafalun esperansa refujiadu Afeganistaun

Roupa tahan ida hafalun esperansa refujiadu Afeganistaun

Hatutan.com, (29 Agostu 2021), Kabul—Sidadaun Afeganistaun lubun maka halai sai (refúijia)  ona hosi Afeganistaun hodi hadook aan hosi rejime Taliban, haktuir sira-nia laran susar tanba lori de’it saida maka sira bele lori ba rai seluk.

“Ha’u lori de’it maka roupa tahan ida ne’ebé ha’u hatais daudaun ne’e. Laliu ida-ne’e,” Wazhma hateten.

Wazhma nu’udar feto Afeganistaun ida ne’ebé deside halai sai hosi Afeganistaun hafoin grupu Taliban domina nasaun refere

Inan-feton ho idade tinan 21 ne’e sei trauma hela, maske daudaun ne’e iha ona fatin refujiadu provizóriu ba refujiadu sira hosi  Afeganistaun iha Emiradu Árabe Unidus(EAU).

“Ha’u ho ha’u nia lean servisu iha Embaixada Estadus Unidus Amérika  (EUA).  Konserteza sira (Taliban) tenke oho ami se ami la halai,” Wazhma ne’ebé nu’udar estudante hosi Fakuldade Medisina iha Afeganistaun ne’ebé Hatutan.com sita hosi Ajénsia Notisioza Fransa  (AFP), Domingu (29/08/2021).

Wazhma ho nia lean, kuñada no sobriña ne’ebé sei bebe hela konsege enfrenta situasaun dilematiku   durante loron tolu iha estrada sidade Kabul nian, molok nia to’o iha aeroportu no evakua kedas ba Amerika.  Nia hateten sei hakarak fila ba nia rai moris fatin, maibé ho rekizitu ida.

“Rekizitu ne’e maka Taliban tenke ses,” Wazhma hateten.

Wazhma la fiar kompromisu sira hosi Taliban atu hola pozisaun moderadu no aberta, liuliu ba feto-maluk sira Afeganistaun nian. Maske nune’e, Wazhma sente sei sente iha responsabilidade tanba maioria nia familia uma-laran kontinua hela iha Afeganistaun

“Buat ida ne’ebé halo hau sei hanoin barak, maka ha’u nia mama, papa no alin feto ho mane sei iha Afeganistaun,” Wazhma haktuir.

Taliban sira kontinua buka tuir ema sira ne’ebé servisu ho forsa koligasaun Estadus Unidus Amérika  ho  Organização do Tratado do Atlântico Norte (NATO, sigla ingles). Ho nune’e maka halo  Wazhma laran lahakmatek kona-ba nia família nia seguransa.

Istória Wazhma kuaze atu hanesan ho buat ne’ebé akontese ba Naim. Mane-maluk ne’ebé sai aman ba oan nain lima ne’e mós  halai husik hela Afeganistaun hafoin Taliban domina Afeganistaun tanba nia servisu ba forsa Estadus Unidus Amérika hanesan tradutór.

Hafoin Taliban serka Kabul iha loron 15 Agostu 2021, Naim ho nia espoza no sira-nia oan nain lima ho nonook no halai subar ba Aeroportu Internasionál Hamid Karzai.

Sira konsege hela kalan tolu iha aeroportu hodi hein aviaun forsa Estadus Unidus Amérika nian hodi lori sai sira hosi Afeganistaun.

“Ami ta’uk tanba Taliban) sira atu oho ami hotu. Ha’u lori de’it maka roupa isin-lolon no ha’u nia oan sira lori de’it mak kartaun identidade. Ami-nia sasán lakon hotu,” Naim, mane ho idade tinan 34 ne’e hateten.

Naim  konfesa katak nia hakarak sai hosi nia nasaun tanba ba nia importante maka nia oan nain lima tenke moris iha situasaun  ne’ebé merese no di’ak.

Estadus Unidus Amérika konfirma, sira sei halo esforsu hotu hodi evakua abitante  Afeganistaun na’in 28,000 no daudaun ne’e sira halibur hela refujiadu 8,500 molok lori sai ba  Estadus Unidus Amérika.

Molok ne’e Amerika deside termina halo evakuasaun hosi Afeganistaun tanba situasaun ne’ebé krusiál tebes. Satan relasiona ho situasaun esplozaun bomba suisida iha Aeroportu Kabul, kinta (26/08/2021) liubá. (*/bit)

Husu Ami ?