Article

Home » Blogs » Horta Hala’o Diplomasia Kafé TL iha Santa-Sé

Horta Hala’o Diplomasia Kafé TL iha Santa-Sé

Hatutan.com, (07 Outubru 2021), Dili—Premiadu Nobel ba Pás no Diplomata Seniór, José Manuel Ramos Horta, lori Kafé Timor tama iha Estadu Santa-Sé no Amu Papa Francisco hemu de’it Kafé Timor.

“Horisehik dadeer bainhira reuniaun formál ho Amu Papa Francisco remata, ha’u atan sarani hateten lia fuan ruma ba ita Katóliku-sira nia Aman boot ho lian Español; Santu Padre nu’udár ema hosi Argentina, Amo Santu hemu karik kafe dadeer-dadeer. Amu Santu tenke hemu de’it kafé Timor ne’ebé di’ak liu iha mundu, di’ak liu kafé Brazíl, di’ak liu kafé Colombia! Amu Papa hatan nune’e, kafé Timor-Leste di’ak liu kafé Costa Rica?, Di’ak liu! Amu Santu. Kafé Timor di’ak liu kafé hotu-hotu iha Mundu!,” Horta haktuir iha ninia pájina ofisiál Instagram, ne’ebé Hatutan.com asesu, Kuarta (07/10).

Amu Papa Francisco hamanasa no Horta mós husu Amu Papa atu bele fahe informasaun ba povu Timor-Leste katak, Santu Padre hemu de’it kafé Timor.

“Amu Santu hatán ho fuan hamanasa; Bele!  Liu tiha, ha’u entrega kafé Timor ba Amu Papa. Oferese mós ba membru juri-sira,” Horta hateten.

Iha 2019, Governu lansa ona planu kompriensivu ida ne’ebé apoia ba dezenvolvimentu setór kafé Timor-Leste iha Dili hanesan Planu Nasionál Dezenvolvimentu Setór Kafé 2019-2030 ho apoiu inisiativa hosi Banku Dezenvolvimentu Aziátiku (ADB) no Asosiasaun Kafé Timor-Leste.

Planu ne’e ho espetativa atu hadi’a produtividade, kualidade no asesu produsaun kafé iha Timor-Leste ba merkadu mundiál.

Planu foun, ne’ebé deskreve nu’udár modelu kolaborativu, ne’e prodús depoizde prosesu konsultivu ho instituisaun Governu, produtór kafé, sentru prosesamentu no esportadór sira no mós Organizasaun Naun-Governamentál (ONG)-sira ho parseiru dezenvolvimentu-sira.

Ante ne’e Ekonomista ADB, David Freedman  konsidera planu Dezenvolvimentu Setór Kafé  sei aselera modernizasaun setór kafé ne’ebé presiza tebes iha Timor-Leste no koordenasaun metin ne’ebé sei asegura susesu hosi implementasaun planu ne’e.

Planu ne’e iha meta ambisiozu atu halo dupla produsaun kafé iha 2030 no aumenta rendimentu esportasaun kafé to’o 270%.

Kafé nu’udár planta istóriku no importante tebes ba Timor-Leste. Kuaze um-tersu hosi uma-ka’in sira iha nasaun ne’e mak kuda kafé no 20% mak depende liu ba kafé hodi hetan osan.

ADB iha kompromisu atu alkansa rejiaun Ázia no Pasífiku ne’ebé prósperu, inkluzivu, reziliente no sustentavel, no sustenta ninia esforsu atu halakon ki’ak.

Iha 2018, ADB halo kompromisu ba empréstimu foun no doasaun ho montante billaun $21.6.

Prezensa Laureadu Nobel ba Paz 1996, José Ramos-Horta iha Santa-Sé, atu hasoru-malu ho Xefe Igreja Katólika, Papa Francisco, hodi ko’alia kona-bá Prêmiu Fraternidade Umanu iha Vatikanu. (fya)

Husu Ami ?