Article

Home » Blogs » Forsa EUA retira ona hosi Afeganistaun

Forsa EUA retira ona hosi Afeganistaun

Hatutan.com, (01 setembru 2021), Washington-Komandante Sentru Komandu Forsa Estadus Unidus Amérika (Centcom), Jenerál Frank McKenzie, deklara katak iha segunda (30/08/2021), nu’udar vou da-ikus aviaun forsa Amérika nian hodi retira hosi Afeganistaun.

“Iha ne’e, ha’u deklara retira ona forsa Amérika hosi Afeganistaun no termina misaun evakuasaun sidadaun Amérika ho sidadaun Afeganistaun sira ne’ebé iha amesa  laran,” hateten McKenzie liuhosi konferénsia imprensa iha Pentagon, segunda, oras Washington nian.

“Aviaun C-17 husik hela Aeroportu Internasionál Hamid Karzai iha Kabul, Afeganistaun, 30 Agostu 2021, purvolta tuku 15:19, oras Afeganistaun,” nia hateten

McKenzie hatutan katak Estadus Unidus Amérika kontinua halo misaun evakuasaun diplomátiku. “momentu ne’e evakuasaun militár ita termina, misaun diplomátiku atu fó serteza ba aumenta sidadaun Amérika no sidadaun Afeganistaun ne’ebé kumpre rekizitu atu sai hosi Afeganistaun,” nia tenik.

Haktuir hosi CNN ne’ebé Hatutan.com sita katak, ofisiál seniór ida hosi Ministériu Negósiu Estranjeiru Amérika nian hateten, laiha ona ema sivíl Amérika  iha Afeganistaun dezde kedas forsa Amerika retira hosi Afeganistaun.

nia espera katak Embaixada Amérika nian iha Kabul bele suspende atividade iha embaixada iha ámbitu forsa Amerika retira hosi Afeganistaun.  

Hosi sorin seluk,  funsionáriu altu ida hosi Taliban nian  afirma katak Taliban marka “istória” hafoin forsa Estadus Unidus Amérika retira hosi Afeganistaun.

“Ami halo tan istória. Okupasaun durante tinan 20 iha Afeganistaun hosi Estadus Unidus Amérika ho NATO termina ona,” hateten Anas Haqqani, alta ofisiál Taliban liuhosi  riska iha Twitter hanesan fó sai iha  Ajénsia notisioza  AFP, tersa (31/08/2021).

“Ha’u kontente tebes katak hafoin liu tinan 20 jihad ho difikuldade oioin, ha;u iha orgullu rasik haree momentu istóriku ne’e,”  Anas Haqqani hateten.

Haqqani mós obriga kombatente Taliban sira termina ka hakotu ona asaun tiru ba vitória atu garante povu sivíl la sofre no kanek tan.

Taliban mós deklara sira-nia independénsia total iha Afeganistaun hafoin forsa Estadus Unidus Amerika hakat sai hosi Afeganistaun. (CNN/AFP/bit)

Husu Ami ?